बाजार समितीच्या प्लॉट बाबतीत केलेले आरोप बिनबुडाचे, माफी मागावी अन्यथा कायदेशीर कारवाई करणार
तासगाव, दि. २७ एप्रिल २०२३ (महाराष्ट्र मराठी न्यूज वृत्तसेवा) काँग्रेसचे तालुका अध्यक्ष महादेव पाटील यांनी राष्ट्रवादी चे नेते सुरेश पाटील व युवा नेते रोहित पाटील यांच्यावर केलेले आरोप हे बिनबुडाचे असून त्यांनी याप्रकरणी त्वरित माफी मागावी अन्यथा आमची मानहानी केली म्हणून त्यांच्या विरोधात कायदेशीर कारवाई करू असा इशारा बाजार समितीचे माजी सभापती रवींद्र पाटील यांनी येथे आयोजित पत्रकार परिषदेत दिला. यावेळी ते म्हणाले तासगाव बाजार समितीच्या संचालक मंडळाने राज्य पणन विभागाच्या नियमानुसार डिपॉझिट घेऊन आवारात असलेले 57 प्लॉट आणि 25 गाळे भाडेतत्त्वाने करार करुन दिलेले आहेत. सुरेश पाटील व रोहित यांना या पध्दतीने जागा भाडेकरार करुन देण्यात आल्या आहेत. मग बाजार समितीकडून भाडे करार करुन जागा घेणा-या सर्व 83 जणांनी ही जागा ढापली असा आरोप महादेव पाटील यांना करायचा आहे का? याचे उत्तर त्यांनी द्यावे. पणनच्या पोटनिमानुसार ज्या कारणासाठी जागा भाडेतत्त्वाने घेतली आहे त्या कारणासाठी वापरली जात नसेल तर प्रति वर्षाला 50 हजार सेवाशुल्क आकारले जाते. त्यानुसार या दोन्हीही जागांचे सेवाशुल्क बाजार समितीने नियमीतपणे भरुन घेतले आहे. यामध्ये कोणताच गैरव्यवहार झालेला नाही. बाजार समितीच्या या निवडणुकीत स्वतःचे पॅनलही उभा राहू शकत नाही हे लक्षात येताच खासदारांच्या पाठीमागे लागून स्वतःपुरती एक जागा महादेव पाटील यांनी मागून घेतलेली आहे. तर बाकीच्या निष्ठावान कार्यकर्त्यांना अर्ज माघारी काढायला लावले. निवडणुकीत मतदार थारा देणार नाहीत आणि आपला पराभव समोर दिसू लागतात मतदारांची दिशाभूल करण्यासाठी अशा प्रकारचे खोटे आरोप करु लागले आहेत. ॲड. आर आर पाटील खरेदी विक्री संघाला गोडाऊन भाड्याने देण्याबाबत महादेव पाटलांनी केलेले आरोपीही बिनबुडाचेच आहेत. प्रत्यक्षात ते गोडाऊन बांधून तसेच पडलेले होते, त्यातूनही बाजार समितीला काहीच उत्पन्न मिळत नव्हते म्हणून पणनच्या नियमानुसारच शेतकऱ्यांच्या संस्थेला भाडे कराराने ते गोडाऊन देण्यात आले आहे. राष्ट्रवादीच्या नेत्यांवर खोटे आरोप करणाऱ्या महादेव पाटलांनी 2018 साली त्यांच्या ग्राहक सेवा केंद्रामध्ये बनावट मतदान ओळखपत्रांची छपाई केली होते. सदर प्रकरणी त्यांच्याविरुद्ध गुन्हा दाखल झाला. त्यांनी तुरुंगाची हवा सुध्दा खाल्लेली आहे. सध्या जामिनावर बाहेर आहेत. गेल्या अनेक वर्षापासून महादेव पाटील यांच्याच आशिर्वादाने तासगाव तहसिलदार कार्यालयाची संरक्षक भिंत पाडून ग्राहक सेवा केंद्र सुरू केले आहे. त्यांच्यावर कायदेशीर कारवाई करावी अशी मागणी आम्ही लवकरच जिल्हाधिकारी कार्यालयाकडे करणार आहोत. काँग्रेसचे भाडोत्री अध्यक्ष असलेल्या महादेव पाटील यांनी पक्षाची विचारधारा सोडून भाजप बरोबर केलेली सोयरीक मतदारास आवडणार नाही. त्यांच्या अवास्तव मागण्यांमुळे युती झाली नाही. त्यांचे आरोप पराभव समोर दिसू लागताच त्यांच्या पायाखालची वाळू घसरल्याने केलेले आहेत. त्यांना रीतसर करार केलेला प्लॉट दिसला पन शेतकऱ्यांचा सहकारातला कारखाना खाजगी करून शेतकरी देशोधडीला लावला हे का दिसत नाही. त्यांनी यावर कधीतरी बोलावं. त्यांच्या कृतीत काँग्रेस दिसत नाही. 11 कोटी खर्च व 55 कोटीचा भ्रष्टाचार कसा असेल. न्यायप्रविष्ट बाब असलेल्या गोष्टीवर हास्यास्पद आरोप ते करत आहेत. त्यांच्याकडे फार लक्ष द्यावे अशी काही परिस्थिती नाही. तासगाव तालुक्यातील कोणता ग्रामपंचायत सदस्य, विकास सोसायटी संचालक, व्यापारी किंवा हमाल यापैकी कुणीही आरोपांना भूलणार नाहीत. या निवडणुकीमध्ये राष्ट्रवादी काँग्रेसच्या पॅनलच्या सर्व जागा मोठ्या मताधिक्याने निवडून येतील असा विश्वास माजी सभापती रवींद्र पाटील यांनी व्यक्त केला. यावेळी खरेदी विक्री संघाचे माजी अध्यक्ष अमोल पाटील, माजी पंचायत समिती सदस्य युवराज पाटील, विवेक शेंडगे आदी उपस्थित होते.
